LP #10: Pag-iisang Dibdib

Mabuhay!  Ang tema ng Litratong Pinoy para sa linggong ito ay “Pagiisang Dibdib”.  Hindi nakakapagtaka dahil ngayon ay buwan na ng Hunyo at marami ang nagpapakasal sa buwan na ito.  Ang mga napili kong ilahok na mga larawan ay kanino pang pag-iisang dibdib kungdi ang sa amin ng aking asawa!

Para sa aming pag-iisang dibdib, aming napagkasunduan ng aking asawa na gumawa ng sarili naming pangako (vows).  Ito ang sa kaniya na isinalin ko na sa wikang Pilipino…

Tinatanggap kita, Weng, bilang aking asawa.  At habang magkasama nating tinatahak ang ating buhay bilang mag-asawa, kalakip nito ay isang pangako ng wagas at tapat na pag-ibig na magiging matatag hindi lamang sa pagsubok ng panahon kundi pati sa iba pang mga pagsubok na darating sa ating buhay.  Mula sa araw na ito, hindi mo lamang ako matalik na kaibigan kundi isang habang-buhay na katuwang na naririto sa tabi mo sa lahat ng araw ng iyong buhay.

Ito namang ang sa akin…

 

Don, simula ng aking kapanganakan, lubos na akong binibiyayaan ng Diyos.  At ang araw na ito, na tugon sa kapwa panalangin natin, ay patunay na ang Diyos ay talagang mabait.  Ikaw ay isang biyaya.  Ikaw ay isang handog (gift).  Sa harap ng ating mga kaibigan, kapamilya (pero kapuso ako ha!) at higit sa lahat sa harap ng Diyos, mataimtim kong ipinapangako, hindi lamang ang ibigin ka sapagkat ika’y iniibig ko na, kundi ang mas lalo ka pang ibigin.  Higit sa pagiging asawa, ako’y iyong magiging kaibigan at lagi akong naririto para sa iyo, katulad nang kung paano ka ring laging naririyan para sa akin.  Aalagaan kita at ang ating magiging pamilya sa lubos ng aking makakaya.  Magkasama nating haharapin ang mga pagsubok na darating sa atin.  Ako’y habang buhay na magiging tapat sa iyo at sa ating pangako.  At mula sa kaibutaran ng aking puso, mahal na mahal kita.

Sa pagtatapos, heto kami noong ika-5 ng Enero 2002…20 pounds ago (aruuuy!)…

…at kami’y namuhay ng maligaya…ever after.

May isa pa akong lahok DITO.