LP #4: Hugis ay Pahaba

Mabuhay!  Para sa linggong ito ng Litratong Pinoy, iniwasan ko ang muling mangalap ng mga bagay na pahaba mula sa palaruan ng aking anak na si Abby.   Ngunit dahil sa wala rin naman akong panahong lumabas at kumuha ng mga panibagong litrato, minabuti kong maghanap na lamang sa aking mga naipong mga litrato.  Hindi naman ako nabigo.

Sa pamamagitan ng mga larawan, akin kayong dadalhin sa lungsod ng Dallas…

Mula sa Dallas Arboretum ay kinunan ko ng litrato ang Dallas skyline.  Hindi ba’t nagtataasang mga hugis pahaba ang makikita?  Tignan natin ng malapitan ang ilan sa mga ito.

 

JP Morgan Chase Tower (pinakamataas na gusali sa gitna ng larawan) – Ang mga arkitekto ng gusaling ito ay sina Skidmore, Owings & Merrill, mas kilala sa pinaigsing pangalang S-O-M.  May taas na 55 palapag, ang JP Morgan Chase tower ay may mga kurbada at mga di pangkaraniwang angulo, at pinaka pansin sa mga ito ay ang butas sa gitna ng gusali.  Ang butas sa gitna ng gusali ay may taas na 75 ft. na nagsisimula sa ika-44 na palapag at nagtatapos sa ika-49.  Ang lapad ng butas na ito ay 27 ft.

 

Bank of America Plaza – Ito ay may taas na 72 palapag at nang matapos itayo noong taong 1985, ito’y hinirang bilang pinakamataas na gusali sa Dallas.  Ang gusaling ito ay binubuo ng mga “silver reflective glass”.  Sa gabi, ang outline ng Bank of America Plaza ay naiilawan ng mahigit dalawang milyang kulay berdeng ilaw at ito’y tanaw sa mga lugar na milya-milya ang layo mula sa gusali.  Ang nagdisenyo ng gusaling ito ay ang JPJ Architects.

 

Comerica Bank Tower (dating kilala bilang Bank One Center) -  Dinisenyo ni Philip Johnson at John Burgee, ang Comerica Bank Tower ay may taas na 60 palapag.  Ito ay gawa sa granite at salamin.  Kakaiba ang tuktok ng gusaling ito kumpara sa ibang gusali sa Downtown Dallas kaya naman ito’y madaling kilalanin.

 

Fountain Place – Ang mga arkitekto ng gusaling ito ay sina I.M. Pei and partners.  Si I.M. Pei ang nagdisenyo ng pyramid sa gitna ng Louvre na matatagpuan sa Paris, France.  Ang Fountain Place ay may taas na 60 palapag at mukhang nagniningning na glass prism, tunay na simbolo ng mataas na uri ng arkitektura.  Kung titignan ang apat na mukha ng gusaling ito, mapapansing walang angulo o mukhang magkapareho.  Tanyag ang gusaling ito sa buong mundo at nakatanggap ng parangal para sa kakaibang disenyo nito.

Hanggang dito na lamang ang aking “lecture”.    Hilig ko talaga ang kumuha ng litrato ng iba’t ibang mga gusali dala na rin ng kursong aking pinagtapusan, Arkitektura.   Salamat sa inyong pagdalaw at sa susunod na Huwebes muli.

DITO naman po ang mga pahaba sa Houston, Texas.

ps:  Nais kong humingi ng paumanhin sa mga kasapi ng LP na nagsidalaw noong isang linggo at nag-iwan ng comment.  Naging abala po ako simula noong nakaraang Huwebes kaya hindi ko po nasagot ang mga comments at hindi ko rin po naibalik ang inyong mga dalaw.  Susubukan kong bumawi ngayong linggong ito.   Salamat po!

 

Tags: dallas